每年嘅一月十日都係日本嘅明太子之日。作為一款可以直接配飯、麵包、意粉、沙律嘅萬能食材，味道微辣但異常開胃，的確係唔少朋友喜愛嘅日式味道之一。今日小編就搵咗三款明太子做主題嘅小食食譜，等大家做個明太子職人啦！

明太子脆薯球 (4人份)

材料
薯仔300g、生粉50g、清湯2茶匙、明太子50g、芝士60g

步驟

1. 薯仔去皮後煲熟，再壓成薯蓉。

2. 薯蓉加入清湯、生粉、明太子後撈勻。

3. 將薯蓉分成適合大細後搓成球狀，再190°C落鑊油炸至金黃色即可。

氣炸明太子多士

材料
厚片多士4片、明太子醬26g、有鹽奶油30g、紫菜絲

步驟

1. 無鹽奶油室溫解凍，解凍後同明太子醬一齊撈勻。

2. 明太子奶油均勻抹上厚片多士。

3. 氣炸鍋170°C炸5分鐘，加埋紫菜絲即可。

氣炸明太子山藥

材料
明太子醬26g、山藥1條、紫菜絲

步驟

1. 先將山藥切塊備用。

2. 明太子醬均勻抹在山藥上。

3. 氣炸鍋180°C炸10分鐘，加埋紫菜絲即可。

3款唔同小食都有濃濃嘅和式風味，啱哂各位思鄉嘅香港人啦！想搵日本嘅熟悉味道，SoZmart都有多款日本小食、甜品，大家可以上嚟click吓買吓㗎！

香港嘅農曆新年要等到二月，不過日本嘅新年就以新曆計算，所以每年嘅1月7日就係佢地嘅人日！喺日本嘅人日，佢地會食一款非常健康嘅菜式，連日本偶像級嘅女星前田敦子都會食㗎！不過根據傳統，佢地會由1月6日開始準備，想學？一於跟住我地一齊做啦！

材料
米250g、七草70g(包括薺菜、蘩縷、水芹、鼠麴、蘿蔔、蕪菁、小鬼田平子，日本百貨店有售)、
水500mL、鹽少許

步驟

1. 先將七草洗淨。

2. 稍微將七草煮好，印乾水分後切碎。

3. 將米洗好，加入500mL水，水煲滾後加米。

4. 最後加入七草同用鹽調味即可。想口感再軟糯啲仲可以加麻糬落去一齊煲！

依款咁健康嘅2人份應節食品10分鐘就可以完成，除咗新年都好啱大家用嚟做早餐，夠快夠方便。唔知你又食開咩日本應節美食呢？可以同我地分享下！

芫茜，係一樣好極端嘅食材。鍾意佢嘅人就係愛佢嘅獨特香味，唔愛佢嘅人就會害怕佢嘅味道。今日小編就為咗同我一樣嘅芫茜控搵嚟依款食譜，一於啱食一齊煮啦！

芫茜醬材料
芫茜40g、羅勒40g、巴馬臣芝士粉1茶匙、橄欖油3湯匙、蒜頭2粒、松子仁20g、鹽半茶匙

材料
意粉50g、蜆300g

步驟

1 將芫茜和羅勒洗淨，建議加少少鹽，再印乾水份，摘取葉片。

2 依次將芫茜、羅勒、松子仁、芝士粉、蒜頭、鹽、橄欖油，倒入攪拌機內攪拌至糊狀即可。

3 煲滾水，落鹽、意粉，烚大概8-10 分鐘，撈起瀝乾水份。

4 開鑊燒熱，再落4 茶匙芫茜醬嘅油。

5 先落蜆略炒，加入兩湯匙水或上湯煮到蜆殼全開口。

6 加埋意粉，再加入 3 茶匙芫茜醬，將意粉撈勻直至均勻沾上青醬色，熄火上碟。

小編貼士
1 因芫茜醬含油份，先爆香少少芫茜醬嘅油去炒蜆就唔洗再加油。
2 做好嘅芫茜醬如果唔係即日食，只要放入製冰模並放入冰格急凍，就可以保存醬料嘅鮮香味。

學咗芫茜醬嘅做法，就可以唔同菜式都用到啦！無論意粉定牛扒都好啱配，今晚一於開個芫茜Party賀一賀佢先！

作為西餐嘅入門菜式，煮意粉真係話難唔難，話易又唔係咁容易。煮太耐又會無哂口感，但煮唔透，太硬都唔會食。最近有日本節目就教咗一個極速煮好意粉嘅秘技，咁大家以後就唔洗長駐廚房，仲可以輕鬆煮到好嘢食啦！

想極速煮到啱口感嘅意粉，首先要準備300mL嘅凍滾水，然後將100g嘅意粉浸入去最少一個鐘，等麵條吸飽水，加快佢嘅傳熱速度。記得係開火煮之前再抹乾，咁就只要1分鐘，都可以有平常煮10分鐘嘅彈牙口感喇！如果怕食唔哂，抹乾水份後，用密實袋封好再放入冰箱，仲可以放足1個月添！另外仲有6個新手常犯嘅錯誤可以話俾大家知，咁以後煮意粉就唔會變成煮麵糊啦！

唔啱Size嘅煲

煮意粉係要用大煲嘅。因為用到嘅水量相當多，多到要足夠俾麵條浮起，才可以煮到平均熟透嘅效果。仲要記得煮麵時加大量嘅鹽，因為鹽可以幫手去除麵條表面黏性澱粉同埋調味。如果加水後覺得麵條痴埋一舊，就代表你選擇嘅煲唔夠大、水唔夠多。

記得走油

好多人誤以為煮意粉時落油，可以防止麵條痴埋一齊。其實嗰想佢地痴埋一齊，只要適時攪拌就OK，熟咗之後就會自然分開。反而大家咁快加油，就會令意粉好難滲入醬汁嘅味道，點煮都差啲。

必留煮麵水

煮意粉後留番嘅煮麵水，咪以為無用，其實佢係煮好意粉嘅重要材料！煮好醬汁，同放入麵條後，加入約一匙嘅煮麵水，可以令醬汁更易滲入麵條，仲可以提升醬汁風味，所以下次咪咁快倒走佢地喇！

醬唔係咁倒

一大罐現成醬汁倒落煮好嘅意粉到，好似好方便，其實大錯特錯。如果要煮有醬汁嘅意粉，最好一齊放入平底鑊一齊煮，咁先可以令麵條充分吸收醬汁，而唔係變成「拌麵」。

太多醬

以為醬汁多味道先會夠濃？其實無論醬汁有幾惹味都好，最佳嘅比例是都1磅意粉（約0.45kg）搭配1.5至2杯醬汁。上枱時，醬汁全部沾在麵條上，無水汪汪嘅多餘醬汁為佳。

碗定碟

無論係意大利粉、闊條麵定係粗管麵都好，將麵條放入碗溫度可以維持較耐。不過，義式麵餃放入碗就較為容易散掉，所以唔同菜式要留意番用咩方法上菜。

睇完以上方法同新手常犯嘅錯誤，一於今晚煮番餐卡邦尼意粉嘆下先。

Party Food點會得5款咁少！今次繼續同大家睇多5款易整易學嘅派對小食，如果係嚟緊嘅party同我地一樣整咗依幾款美食，記得係IG Tag番我地，等小編都可以感受下節日氣氛！

焦糖蘋果玫瑰

材料
焦糖醬3湯匙、牛油2湯匙、蘋果2個、千層酥皮3塊、
糖3茶匙、檸檬半個、糖霜

步驟

1 蘋果連皮切片，大概2-3mm厚度。

2 開火將蘋果片放入水中，加砂糖、檸檬汁煮3分鐘至軟身，撈起備用。

3 將酥皮解凍，對折兩次，切成約4cm寬長條狀。將6-7片蘋果鋪喺上面，下層掃上焦糖醬，覆上酥皮，用手慢慢捲成花狀。

4 喺花瓣上面掃上牛油液，放入預熱200℃焗爐，焗10分鐘。最後用糖霜裝飾。

牛油果蝦仁脆片

材料
牛油果4個、急凍蝦仁20隻、番茄仔10粒、蒜頭2粒、青檸2個、
番荽1條、原味希臘乳酪1杯、墨西哥玉米脆片1包、鹽、辣椒粉、黑胡椒、橄欖油

步驟

1 急凍蝦仁解凍後，用鹽、辣椒粉、黑胡椒略醃。用中高火，將蝦仁煎香。

2 牛油果切半去核壓成蓉。番茄仔切粒，再切碎番荽及蒜頭，青檸榨汁，全部加入牛油果蓉撈勻。

3 牛油果蓉放上墨西哥脆片，加少許希臘乳酪，放蝦仁後加番荽裝飾即可。

焗蟹肉魚子多士

材料
法包1條、盒裝蟹肉150g、忌廉芝士150g、蛋黃醬1.5湯匙、
豉油1.5湯匙、芝士碎100g、蒔蘿、紅辣椒粉、黑胡椒碎、鹽、牛油、魚子

步驟

1 蟹肉同忌廉芝士撈勻，再慢慢加入蛋黃醬、豉油、紅辣椒粉、蒔蘿碎、黑胡椒碎、鹽後撈勻。

2 法包斜切約1.5cm 厚，塗上蟹肉醬，灑芝士碎，放入已預熱至180℃焗爐焗10分鐘。

3 最後用魚子、蒔蘿碎裝飾就完成。

氣炸拐杖餅乾

材料
無鹽奶油50g、雞蛋半隻、低筋麵粉120g、糖粉25g、紅麴粉3g、朱古力粉3g、鹽

步驟

1 將無鹽奶油室溫解凍後，分批加入鹽同過篩嘅糖粉後，再加蛋漿，每次都震攪拌均勻。
2 分三次加入過篩麵粉，再用刮刀切拌均勻至無任何麵粉粒。

3 將麵糰分三份，其中兩份加入紅麴粉、可可粉，記得用刮刀切拌均勻。

4 各麵糰各取約5g，搓成球狀。

5 取兩個小圓，分別搓成約5-6cm；慢慢將佢地扭埋一齊，再搓長至10-13cm。

6 捏成拐杖造型，炸籃鋪上烘焙紙後，放入氣炸鍋用170度先炸10分鐘，翻面再炸5分鐘就完成。

三色雪球餅

材料
無鹽奶油140g、糖粉42g、低筋麵粉97g、杏仁粉5g、
草莓粉5g、抹茶粉4g、太白粉120g

步驟

1 無鹽奶油室溫解凍，用打蛋器打至稍為泛白。

2 糖粉過篩加入奶油，繼續打至略為蓬鬆嘅狀態。

3 準備三個碗，分別裝好原味、抹茶同草莓味嘅材料。

4 將奶油糖霜秤重，先分出1/3到另一個碗入面。

5 將原味嘅材料過篩加入，然後用刮刀輕輕攪拌均勻，再用按壓嘅方式整理好。
6 用保鮮紙包好，放入冰箱冷藏至少15分鐘。

7 同樣方式整出草莓口味、抹茶口味嘅粉團，記住要將佢地包好放入冰箱呀！

8 焗爐170度預熱，焗盤鋪好焗爐紙。拎出唔同口味嘅粉團，用切板分成7份，再搓成雪球形狀。

9 170度焗12分鐘後熄火，再焗多8分鐘。

10 攤凍之後就可以加埋糖粉就食得喇！

有齊咁多款菜式你揀，鹹甜飲品麵整到，今個聖誕、新年就唔怕無嘢招呼朋友啦！